नेपाल सरकार
कृषि, वन तथा पर्यावरण मन्त्रालय
कृषि सूचना तथा प्रशिक्षण केन्द्र · हरिहरभवन, ललितपुर
किसान सूचीकरण प्रणाली · Farmer Registration System
यो निर्देशिका वडा कार्यालयका लागि तयार पारिएको हो। किसान सूचीकरण प्रक्रियामा वडाको भूमिका प्रमाणीकरण हो, अर्थात् पालिकाबाट प्राप्त विवरण स्थलगत यथार्थसँग मिल्छ कि मिल्दैन जाँची प्रमाणित गर्ने।
वडा कार्यालयले आफ्नो वडाभित्रका किसानको विवरण मात्र देख्दछ। अन्य वडाको विवरण देखिँदैन। यो प्रणालीको सुरक्षा व्यवस्था हो।
प्रणालीमा प्रवेश गर्न वडा कार्यालयलाई तोकिएको प्रयोगकर्ता नाम र पासवर्ड आवश्यक पर्दछ। पासवर्ड बिर्सनुभएको वा खाता बन्द भएको अवस्थामा सम्बन्धित स्थानीय तह वा कृषि कार्यालयमा सम्पर्क गर्नुहोस्।
लग-इन गरेपछि देखिने ड्यासबोर्डमा वडाले गर्नुपर्ने काम र वडाका किसानहरूको अवस्था देखिन्छ।
“वडामा प्रमाणीकरण बाँकी” सूचीमा पालिकाले पठाएका किसान देखिन्छन्। सूचीमा किसानको नाम, नागरिकता नम्बर, ठेगाना र तथ्याङ्क त्रुटि देखिन्छ। जाँच्नुपर्ने किसानको पङ्क्तिमा रहेको “हेर्नुहोस्” बटनमा क्लिक गरी विवरण खोल्नुहोस्।
विवरण पृष्ठमा किसानको व्यक्तिगत विवरण, परिवार, जग्गा, बाली, पशुपन्छी र कागजात सबै एकै ठाउँमा देखिन्छ। स्थलगत यथार्थसँग मिलेको सुनिश्चित गरेपछि मात्र प्रमाणित गर्नुहोस्।
माथिबाट क्रमशः व्यक्तिगत विवरण, पारिवारिक विवरण, जग्गा तथा सिँचाई, बाली उत्पादन र पशुपन्छी जाँच्नुहोस्। नाम, नागरिकता नम्बर, जन्म मिति र ठेगाना किसानको कागजातसँग भिडाउनुहोस्। पृष्ठको माथिल्लो भागको “प्रिन्ट” बाट पूरा विवरण छापी क्षेत्रमा लैजान पनि सकिन्छ।
कुनै विवरण फरक परेमा वडा कार्यालयले आफैँ सच्याउन सक्दछ। सच्याउँदा “परिवर्तनको कारण” लेख्नु अनिवार्य छ।
पालिकाले “वडामा फिर्ता” गरेको विवरण, र केन्द्रले फिर्ता पठाएको विवरण, दुवै “वडामा प्रमाणीकरण बाँकी” सूचीमै आउँछन्। अर्थात् फिर्ता आएको विवरण पनि तपाईंकै कामको सूचीमा देखिन्छ।
कुन विवरण किन फिर्ता भयो भन्ने कुरा किसानको विवरण पृष्ठको “इतिहास” मा कारणसहित अभिलेख भएको हुन्छ। सच्याउनुअघि सो कारण अनिवार्य रूपमा पढ्नुहोस्।